وفاق اور پنجاب میں حکومت سازی کیلئے پی ٹی آئی اور (ق) لیگ میں فارمولہ طے پاگیا

پرویز الٰہی اسپیکر پنجاب اسمبلی ہونگے ،(ق) لیگ کو وفاق اور پنجاب میں 2،2وزارتیں بھی دی جائینگی پی ٹی آئی کا (ق) لیگ ،آزاد امیدواروں کو ساتھ ملا کر مطلوبہ نمبر حاصل کرنے کا دعویٰ ، بیشتر جماعتوں کا اہم اجلاس کل ہوگا

بدھ 1 اگست 2018 16:54

لاہور (اُردو پوائنٹ اخبار آن لائن۔ بدھ 1 اگست 2018ء) تحریک انصاف اور مسلم لیگ (ق) کے درمیان وفاق اور پنجاب میں حکومت سازی کے لیے فارمولہ طے پاگیا۔نجی ٹی وی کے مطابق حکومت سازی کے لیے دونوں جماعتوں کے درمیان طے پانے والے معاہدے کے تحت چوہدری پرویز الٰہی اسپیکر پنجاب اسمبلی ہوں گے اور وہ پہلے ہی پنجاب اسمبلی میں خدمات انجام دینے کی خواہش کا اظہار کرچکے تھے۔

نجی ٹی وی کے مطابق ذرائع کا کہنا ہے کہ تحریک انصاف مسلم لیگ (ق) کو وفاق اور پنجاب میں 2، 2وزارتیں بھی دے گی اور وزارتوں کا فیصلہ اسپیکر کے انتخاب کے بعد کیا جائے گا۔یاد رہے کہ مسلم لیگ (ق) کی قومی اسمبلی میں 4اور پنجاب اسمبلی میں 7نشستیں ہیں اور یہ انتخابات کے دوران پی ٹی آئی کی اتحادی جماعت تھی۔

(جاری ہے)

قومی اسمبلی میں حکومت بنانے کے لیے کسی بھی جماعت کو 137اور پنجاب اسمبلی میں 149ارکان کی ضرورت ہے، اس وقت تحریک انصاف کی قومی اسمبلی میں 116اور پنجاب اسمبلی میں 123ارکان کی تعداد ہے۔

دوسری جانب مسلم لیگ (ن) کے وفاق میں 64اور پنجاب اسمبلی میں 129ارکان ہیں اور پنجاب میں حکومت سازی کے لیے یہ بھی بھرپور کوششیں کر رہی ہے۔تحریک انصاف نے (ق) لیگ اور آزاد امیدواروں کو ساتھ ملا کر مطلوبہ نمبر حاصل کرنے کا دعوی کر رکھا ہے تاہم بیشتر جماعتوں کا حکومت سازی کے حوالے سے اہم اجلاس آج ( جمعرات ) ہوگا، جس میں مسلم لیگ (ن) ، پیپلز پارٹی، متحدہ مجلس عمل، عوامی نیشنل پارٹی، پشتونخوا ملی عوامی پارٹی اور دیگر شامل ہیں۔