سینیٹ کی قائمہ کمیٹی برائے خزانہ ومحصولات کی نیکوٹین پاوچزپر18 فیصدسیلزٹیکس کی تجویز کی منظوری دیدی

اسلام آباد (اُردو پوائنٹ اخبارتازہ ترین - اے پی پی۔ 20 جون2024ء) سینیٹ کی قائمہ کمیٹی برائے خزانہ ومحصولات نے نیکوٹین پائوچز پر 18 فیصد سیلزٹیکس کی تجویز کی منظوری دیدی ہے۔ سینیٹ کی قائمہ کمیٹی برائے خزانہ و محصولات کا اجلاس جمعرات کویہاں پارلیمنٹ ہائوس میں منعقد ہوا۔اجلاس میں فنانس بل 2024 کا جائزہ لیاگیا۔ اجلاس کی صدارت سینیٹر سلیم مانڈوی والانے کی۔

اجلاس میں سینیٹر شیری رحمان، فاروق حامد نائیک، محسن عزیز، فیصل واوڈا، سینیٹر منظور احمد کا کڑ ، فیڈرل بورڈ آف ریونیو (ایف بی آر) کے حکام اور متعلقہ شراکت داروں نے شرکت کی۔ اجلاس میں مناسب ٹیکس سٹامپ یا لیبل کے بغیر سگریٹ کے پیک فروخت کرنے والے خوردہ فروشوں کے آئوٹ لیٹ سیل کرنے سمیت سزائوں اور ای لیکویڈز اورکم قیمت والے سگریٹ برانڈز پر پابندیوں سے متعلق ترامیم کا جائزہ لیاگیا۔

(جاری ہے)

کمیٹی نے نیکوٹین پائوچز پر 18 فیصد سیلزٹیکس کی منظوری دی جبکہ الیکٹرانگ سگریٹ کی درآمد پر ڈیوٹی کا جائزہ لیاگیا۔ اجلاس میں پیکڈ جوسز پر 20 فیصد فیڈرل ایکسائز ڈیوٹی (ایف ای ڈی) کو ختم کرنے کی تجویز پر بھی غور کیاگیا۔ فروٹ جوس کونسل کا موقف تھا ٹیکس کے موجودہ ڈھانچہ و جی ایس ٹی سے صارفین کو سستی جوسز کی فراہمی میں رکاوٹیں پیش آرہی ہے اور مقامی جوس مینوفیکچررز کی برآمدی صلاحیت بھی متاثر ہو رہی ہے تاہم کمیٹی نے موجودہ ٹیکس ڈھانچے کو برقرار رکھنے کا فیصلہ کیا۔

اجلاس میں پراپرٹی کے شعبہ میں میں ٹیکس کے مسائل اور آئندہ مالی سال کے لیے متوقع افراط زر کی شرح کا بھی جائزہ لیاگیا ۔ سینیٹر سلیم مانڈوی والا نے ٹیکس عائد کرنے کی وجہ سے صارفین پر ممکنہ اثرات کے بارے میں اپنے خدشات کا اظہار کیا جبکہ ایف بی آر کے چیئرمین نے مختلف شعبوں میں ٹیکس کی موجودہ شرحوں پر روشنی ڈالی۔اجلاس میں الیکٹرک اور ہائبرڈ گاڑیوں پر ٹیکس کی شرحوں پر بحث کی گئی۔

سینیٹر فیصل واوڈا نے ایندھن سے آزاد ٹیکنالوجیز پر سرمایہ کا روں کا اعتماد برقرار رکھنے کے لیے معاون پالیسیوں پر زوردیا ۔ ایف بی آر کے حکام نے درآمدی اور مقامی طور پر تیار کی جانے والی گاڑیوں کے درمیان ٹیکس گیپ کا حوالہ دیا اوربتایا کہ اس طرح کے معاملات وزارت صنعت کے دائرہ اختیارمیں ہیں ۔اجلاس میں ٹیلی کمیونیکیشن اور سٹیل ملوں کے سٹیک ہولڈرز نے تجاویز اورسفارشات پیش کیں۔

ٹیلی کمیونیکیشن شعبہ کی جانب سے موبائل ہینڈ سیٹس پر ایڈوانس ٹیکس کی وصولی اور سیلز ٹیکس سے متعلق شکایات پیش کی گئیں جبکہ سٹیل مل انڈسٹری سے متعلق مسائل کو مزید جائزہ اور حل کے لیے بے ضابطگی کا جائزہ لینے والی کمیٹی کے پاس بھیج دیا گیا۔ چیئرمین ایف بی آر نے اجلاس کے دوران محصولات میں اضافے کے حوالہ سے اپنے اعتمادکااظہارکیا۔ سینیٹر سلیم مانڈوی والا نے کہاکہ ٹیکسوں میں اضافہ سے مہنگائی کی شرح میں اضافہ ہو سکتا ہے۔