ساہیوال ٹیچنگ ہسپتال میں ڈاکٹروں کی گرفتاری کے خلاف ینگ ڈاکٹرز اور نرسوں کا وزیر اعلی پنجاب مریم نواز سے معافی مانگنے کا مطالبہ

لاہور(اردوپوائنٹ اخبارتازہ ترین-انٹرنیشنل پریس ایجنسی۔20 جون۔2024 )لاہور میں ساہیوال ٹیچنگ ہسپتال میں ڈاکٹروں کی گرفتاری کے خلاف ینگ ڈاکٹرز اور نرسوں نے وزیر اعلی پنجاب مریم نواز سے معافی مانگنے کا مطالبہ کرتے ہوئے لاہور کے تمام سرکاری ہسپتالوں کی او پی ڈیز میں ہڑتال کردی ہے،صوبائی دارالحکومت لاہورکے جنرل ہسپتال، میو ہسپتال، جناح ہسپتال، سروسز ہسپتال اور گنگارام ہسپتال کے آﺅٹ ڈور بند ہیں، اس کے علاوہ پی آئی سی، لیڈی ولنگڈن، لیڈی ایچی سن ہسپتال میں بھی کام بند ہے.

(جاری ہے)

صدر ینگ ڈاکٹرز ایسو سی ایشن ڈاکٹر شعیب نیازی نے کہا کہ وزیر اعلی پنجاب مریم نواز کے معافی مانگنے تک او پی ڈیز بند رہیں گی انہوں نے کہا کہ مریم نواز نے پرنسپل سمیت سینئر اساتذہ کو ہتھکڑیاں لگوائی ہیں، مریم نواز نے پوری ڈاکٹرز کمیونٹی کی بے عزتی کی ہے ینگ ڈاکٹرز نے مطالبہ کیا کہ ڈاکٹرز کی گرفتاری میں ملوث افراد کو قانون کے کٹہرے میں لایا جائے، ہسپتالوں میں سیکورٹی کے بل کو فوری طور پر منظور کرایا جائے، ڈاکٹرز کی گرفتاری کے معاملے کی مکمل انکوائری کی جائے، سیاسی انتقام کا نشانہ بننے والے ڈاکٹرز اور نرسسز کو فوری بحال کیا جائے، وزیر اعلی پنجاب اور ہیلتھ سیکرٹری معاملے پر فوری معافی مانگیں.

انہوں نے مطالبات کی منظوری تک ہڑتال جاری رکھنے کا اعلان کیا ہے دوسری جانب خانیوال میں 3 بچوں کی ہلاکت اور اسٹاف نرس کی گرفتاری پر ینگ نرسوں نے وزیراعلی سیکرٹریٹ 8 کلب روڈکے سامنے احتجاج شروع کردیا انہوں نے کہا کہ فارماسیوٹیکل کمپنیوں کے خلاف کارروائی کے بجائے نرس کو گرفتار کرلیا گیا انہوں نے کہا کہ اگر اسٹاف نرس کی غفلت تھی تو پہلے انکوائری کرتے، حکومتی رویے کے خلاف ہمارا احتجاج جاری رہے گا.

اس کے علاوہ نرسوں نے نشتر ہسپتال اور چلڈرن کمپلیکس میں بھی احتجاجی مظاہرہ کیا مظاہرین کا کہنا تھا کہ نرس اقصٰی کی رہائی تک روزانہ کی بنیاد پر احتجاج کیا جائے گا واضح رہے کہ 14 جون کو خانیوال ڈسٹرکٹ ہیڈ کوارٹر ہسپتال میں زیر علاج تین کمسن بچوں کو اینٹی بائیٹک انجکشن لگائے گئے تھے تاہم انجیکشن لگتے ہی بچے جاں بحق ہوگئے تھے. بعد ازاں ورثا نے ڈی ایچ کیو ہسپتال میں احتجاجی مظاہرہ کرتے ہوئے سیکرٹری ہیلتھ سے نوٹس لینے کا مطالبہ کیا جس کے بعد ڈسٹرکٹ انتظامیہ نے ابتدائی انکوائری کے ذریعے متعلقہ ہیڈ نرس اقصٰی کے خلاف مقدمہ درج کرکے اسے نرسنگ ہاسٹل سے گرفتار کرلیا تھانرس اقصی کی گرفتاری کے خلاف نرسوں نے احتجاج شروع کردیا تھا.