فلیٹ کیلئے بیٹے نے بیوی اور دوستوں سے مل کر عید کے روز باپ کو قتل کردیا

کراچی ( اُردو پوائنٹ اخبارتازہ ترین۔ 25 جون 2024ء ) صوبہ سندھ کے دارالحکومت کراچی میں فلیٹ ہتھیانے کیلئے بیٹے نے عید کے روز باپ کو قتل کردیا۔ ایکسپریس کے مطابق سرجانی ٹاؤن تھانے کے علاقے کے ڈی اے ایکسٹینشن فیز 2 میں فلیٹ کے باتھ روم سے چند روز پرانی ایک شخص کی لاش ملی، مقتول کو تشدد کے بعد ہتھوڑا مار کر قتل کیا گیا، جس کی شناخت 43 سالہ سید شاہد علی ولد سردار علی کے نام سے ہوئی، مقتول شاہد علی سندھ سیکریٹریٹ کا ملازم تھا، جس کی لاش ملنے پر پولیس نے واقعے کا مقدمہ سرجانی ٹاؤن تھانے میں درج کرکے تفتیش کا آغاز کردیا۔

واقعے سے متعلق ایس ایس پی ویسٹ حفیظ الرحمن بگٹی نے بتایا کہ مقتول شاہد علی کو عیدالاضحٰی کے دوسرے روز قتل کیا گیا، پیر کو فلیٹ سے تعین اٹھنے پر پولیس کو واقعے کی اطلاع ملی، پولیس نے تفتیش شروع کی تو شواہد ملنے پر شہری شاہد علی کے قتل میں ملوث مقتول کے سگے بیٹے ملزم بلال کو اس وقت گرفتار کیا جب وہ شہر چھوڑ کر فرار ہو رہا تھا، جس کے بعد اس کی بیوی ماہ نور زوجہ بلال اور بلال کے 2 دوستوں احمر ولد عامر، انعام ولد ولید کو بھی گرفتار کرلیا گیا، گرفتار ملزمہ سے مقتول کا موبائل فون ملا جب کہ جائے وقوعہ سے قتل میں استعمال ہونے والا ہتھوڑا، ایک پردہ اور چادر ملی جس میں لاش کو لپیٹا گیا تھا۔

(جاری ہے)

انہوں نے مزید بتایا کہ مقتول شاہد علی نے 14 سال قبل اپنی بیوی کو طلاق دے دی تھی، جس کے بعد سے مقتول کا بیٹا اپنی والدہ کے ساتھ رہائش پذیر تھا، مقتول کی سابقہ بیوی نے طلاق کے بعد نعمان نامی شہری سے دوسری شادی کرلی جس کے بعد مقتول کا بیٹا دوستوں کے گھر شفٹ ہوگیا، بعد ازاں مقتول کے بیٹے بلال نے بھی شادی کرلی اور اس کی دو بیٹیاں ہیں، بلال کی بیوی اپنے میکے میں رہائش پذیر تھی کیوں کہ بلال کے پاس رہنے کا کوئی ٹھکانہ نہیں تھا۔

ایس ایس پی ویسٹ سے معلوم ہوا کہ مقتول شاہد علی اپنے فلیٹ میں اکیلا رہتا تھا، جس کے بیٹے بلال نے اپنی بیوی اور 2 دوستوں سے مل کر باپ کے قتل کا منصوبہ بنایا تاکہ وہ والد کا فلیٹ حاصل کرکے اس میں رہائش اختیار کرسکے، قتل میں مدد کے لیے اس نے دوستوں کو اپنے والد کی پینشن کی مدد میں ملنی والی رقم کا لالچ دیا، منصبے کے تحت عیدالاضحٰی پر بلال اپنی بیوی کے ہمراہ والد سے عید ملنے گیا جہاں اس نے دوستوں کو بھی بلوایا ہوا تھا، اسی روز اپنے بیوی اور دوستوں کے ساتھ والد کو قتل کیا اور فرار ہوگئے۔