پی ٹی آئی بتائے کہ وہ پاکستان کے ساتھ ہے یا دہشتگردوں کے ساتھ ہیں؟

اسلام آباد ( اردوپوائنٹ اخبارتازہ ترین۔ 28 جون 2024ء) وزیردفاع خواجہ آصف نے کہا ہے کہ پی ٹی آئی بتائے کہ وہ پاکستان کے ساتھ ہے یا دہشتگردوں کے ساتھ ہیں؟ ان کی تقاریر اس بات کا ثبوت ہے کے وہ دہشت گردی کے پشت پناہ ہیں۔ انہوں نے ایکس پر اپنے ٹویٹ میں کہا کہ پی ٹی آئی بتائے کہ وہ پاکستان کے ساتھ ھے یا پاکستان کے خلاف دھشت گردی خون ریزی  کرنے والوں کے ساتھ ھے۔

انکی تقاریر اس بات کا ثبوت ھے کے وہ دھشت گردی کے پشت پناہ ھیں۔ خواجہ آصف نے مزید کہا کہ میں نے 2 روز قبل کہا تھا کہ افغان سر زمین سے پاکستان پہ حملے ھو رہے ھوں اور ھمارے ھمسائے کے زمین ھمارے وطن میں دہشت گردی کے لئے استعمال ھو رہی ھے۔ آج قومی اسمبلی میں اسد قیصر نے میرے اس بیان کی خلاف تقریر کی اور مذمتی الفاظ استعمال کیے۔

(جاری ہے)

اگر پی ٹی آئی پاکستان کو دفاع کا حق نہیں دینا چاہتی وطن کے دفاع کی بجائے اپنی سیاست کا دفاع کرنا چاہتی ھے تو پاکستانی عوام ان کو شناخت کرتی ھے۔

 یاد رہے گزشتہ روز امریکی خبررساں ادارے کو انٹرویو میں وزیردفاع خواجہ آصف نے کہا کہ عزم استحکام آپریشن شروع کرنے کی پالیسی جلد بازی میں نہیں آئی ، پچھلے دنوں دہشتگردی کے واقعات میں بہت اضافہ ہوا ہے، کچھ سیاسی گروپ اور جماعتیں سیاسی مفادات کیلئے اس کی مخالفت کررہے ہیں، عزم استحکام آپریشن پر سیاسی جماعتوں کے تحفظات دور کئے جائیں گے، اس کو قومی اسمبلی میں لائیں گے، اپوزیشن کو آپریشن کے خدوخال بتائیں گے۔

انہوں نے کہا کہ ٹی ٹی پی سے کیا بات چیت ہونی ہے؟ کوئی کامن گراؤنڈ ہو تو بات ہوسکتی ہے۔پی ٹی آئی اپنے دور حکومت میں بات چیت کے ذریعے 4 سے 5ہزار طالبان لے کر آئیں ہیں۔وزیردفاع خواجہ آصف نے کہا کہ دہشتگردی ختم نہیں ہوگی تو غیرملکی سرمایہ کاری کیسے آئے گی؟پاکستان کی سالمیت کیلئے ٹی ٹی پی کو سرحد پار نشانہ بنایا جاسکتا ہے، ٹی ٹی پی سرحد پار سے اور ان کے کچھ سیل پاکستان کے اندر بھی کام کررہے ہیں، بانی پی ٹی آئی کے کہنے پر افغانستان سے 4، 5لوگ پاکستان لائے گئے تھے، افغان سرزمین سے ہماری سرزمین پر دہشتگردی ایکسپورٹ ہونا بین الاقوامی قانون کی خلاف ورزی ہے، پاکستان میں دہشتگردی کرنے والے افغان سرزمین پر پناہ لئے ہوئے ہیں، ایک فریق ہمسائیگی کا حق ادا نہیں کررہا اور بین الاقوامی قانون کی خلاف ورزی کررہا ہے۔

آپریشن میں امریکا کی مدد نہیں لیں گے ہم خود کریں گے۔ خواجہ آصف نے کہا کہ پاکستان کی سکیورٹی صورتحال پر چین کے تحفظات ہیں۔چین پاکستان کو معاشی طور پر خود مختار دیکھنے کا خواہش مند ہے، پاکستان اگر سکیورٹی صورتحال بہتر بنا لے تو ہم چین کی پہلی ترجیح ہیں، معاشی مشکلات بھی ایک وجہ ہے جس کے باعث آپریشن کیا جارہا ہے، جب تک دہشتگردی ختم نہیں ہوگی ہماری معاشی صورتحال بہتر نہیں ہوگی۔پچھلے فوجی آپریشنز ناکام نہیں تھے ، آپریشنز کے بعد سویلین حکومتوں کو جو کردار ادا کرنا تھا نہیں کیا گیا۔