چاغی کے نواحی گاؤں نوک چاہ میں صاف پانی کی فراہمی کے لیے آر او پلانٹ نصب

چاغی (اُردو پوائنٹ اخبارتازہ ترین - اے پی پی۔ 22 جون2024ء) ریکوڈک مائننگ کمپنی(آر ڈی ایم سی ) نے ضلع چاغی کے نواحی گاؤں نوک چاہ میں عوام کو پینے کے صاف پانی کی فراہمی کے لیے آر او پلانٹ نصب کر دیا ہے ۔ آر ڈی ایم سی کے مطابق نوک چاہ گاؤں کے آر او پلانٹ کا افتتاح مقامی افراد ، کمیونٹی ڈویلپمنٹ کمیٹی(سی ڈی سی) اراکین اور آر ڈی ایم سی کے نمائندوں کی موجودگی میں ہوا۔

آر ڈی ایم سی کی جانب سے ضلع چاغی میں یہ تیسرا آر او پلانٹ ہے جسے نوک چاہ گاؤں میں لگاکر فعال کر دیا گیا۔ اس سے قبل ہمئے اور مشکی چاہ کے گاؤں میں بھی آر او پلانٹ لگا ئے گئے تھے۔ آر ڈی ایم سی کی جانب سے لگائے گئے تمام آر او پلانٹس سولر پاور سے چلتے ہیں جو کہ علاقے میں بجلی کی ترسیل کے نیٹ ورک کو درپیش چیلنجز کے پیشِ نظر ایک پائیدار حل ہے۔

(جاری ہے)

نوک چاہ میں لگایا گیا پلانٹ معیاری ٹیکنالوجی کا حامل ہے جو روزانہ5 ہزار گیلن محفوظ اور صاف پینے کا پانی فراہم کرتی ہے۔ نوک چاہ میں آر او پلانٹ کی تنصیب سے قبل وہاں پانی کا ٹی ڈی ایس لیول 5222 سے زائد تھا جو کہ مضر صحت تھا تاہم آر او پلانٹ کی وجہ سے اب ٹی ڈی ایس لیول کم ہو کر 250 سے 300 تک پہنچا ہے جو کہ پینے کے پانی کی انسانی صحت کو درکار معیار پر پورا اترنے کو یقینی بناتا ہے۔

اس سے قبل نوک چاہ اور گرد و نواح کے مکینوں کو صاف پانی کے حصول میں مشکلات کا سامنا تھا جس کی وجہ سے وہ مجبور ہوکر غیر محفوظ ٹی ڈی ایس لیول کا پانی استعمال کرکے اپنے صحت کو خطرات سے دوچار کرتے تھے تاہم آر ڈی ایم سی نے جدید ٹیکنالوجی اور قابلِ تجدید انرجی کی مدد سے مقامی افراد کا یہ مسئلہ حل کرکے انھیں بہتر معیار زندگی فراہم کردیا۔

پرائمری اسکول اور ٹیکنیکل ٹریننگ سینٹر کے قیام کے لیے ہنر فاؤنڈیشن اور صحت کی معیاری سہولیات کی فراہمی کے لیے انڈس ہسپتال ہیلتھ کیئر نیٹورک کے ساتھ اشتراک کیا گیا۔ یہ اجتماعی منصوبے سی ڈی سی اراکین کی مشاورت سے دیرپا اور اجتماعی ترقی سمیت ریکوڈک پراجیکٹ کی جانب سے مقامی شراکت داروں کی معیار زندگی بلند کرنے کو یقینی بناتے ہیں۔ افتتاحی تقریب کے دوران مقامی افراد سمیت اس منصوبے کو شروع کروانے والے سی ڈی سی پراہ کوہ کے اراکین نے آر ڈی ایم سی انتظامیہ کی جانب سے ضروریات پر مبنی منصوبوں کو ترجیح دینے کی تعریف کی۔