وفاقی حکومت کا گھریلو صارفین سے استعمال شدہ بجلی کے بل کے علاوہ ایک ہزار روپے تک فکسڈ چارجز لگانے کی تجویز پر غور

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔21 جون۔2024 ) وفاقی حکومت کی جانب سے بجلی کے گھریلو صارفین سے استعمال شدہ بجلی کے بل کے علاوہ ایک ہزار روپے تک فکسڈ چارجز لگانے کی تجویز پر غور کیا جارہا ہے نیشنل الیکٹرک پاور ریگولیٹری اتھارٹی (نیپرا) نے بتایاہے کہ مجوزہ فکسڈ چارجز بجلی کے اوسط متعین بنیادی ٹیرف 5 روپے72پیسے میں شامل ہیں، گھریلو صارفین کے ٹیرف میں پہلے فکسڈ چارجز عائد نہیں تھے.

نیپرا کا کہنا ہے کہ ماہانہ 301 سے 400 یونٹ استعمال پر 200 روپے، ماہانہ 401 سے 500 یونٹ بجلی استعمال پر 400 روپے، ماہانہ 501 سے 600 یونٹ استعمال پر 600 روپے جبکہ ماہانہ 601 سے 700 یونٹ استعمال پر 800 روپے فکسڈ چارجز لگانے کی تجویز ہے.

(جاری ہے)

نیپرا حکام کے مطابق ماہانہ 700 یونٹ سے زیادہ استعمال پر ایک ہزار روپے فکسڈ چارجز لگایا جائے گانیپرا کی یکم جولائی 2024 سےفکسڈ چارجزکی تجویز ہے، فیصلہ وفاقی حکومت کرے گی نیپرا حکام کا کہنا تھا کہ بنیادی ٹیرف کا حتمی فیصلہ وفاقی حکومت کی درخواست آنے کے بعد ہوگا، تمام فکسڈ چارجز بنیادی ٹیرف کا حصہ ہیں، یہ ٹیرف سے الگ نہیں ہے.

کمرشل کے لیے فکسڈ چارجزمیں 300 فیصد اور صنعتی صارفین کے لیے 355 فیصد تک اضافہ کیا گیا ہے اس سے ڈسکوز کو مقررہ چارجز کے ذریعے اپنی آمدنی بڑھانے میں مدد ملے گی ٹی او یو (ٹائم آف یوز) میٹر استعمال کرنے والے رہائشی صارفین بھی ماہانہ 1000 روپے مقررہ چارجز ادا کریں گے 5 کلو واٹ سے کم لوڈ والے کمرشل صارفین بھی ماہانہ 1000 روپے مقررہ چارجز ادا کریں گے تاہم 5 کلو واٹ یا اس سے زیادہ لوڈ والے بجلی کے کمرشل صارفین موجودہ 500 روپے سے 2000 روپے ادا کریں گے جس میں 300 فیصد اضافہ ظاہر کیا گیا ہے.

ٹی او یو میٹرنگ کے تحت 25 کلو واٹ تک استعمال کرنے والے صنعتی صارفین جو بی ون کیٹیگری میں آتے ہیں وہ 1000 روپے ادا کریں گے تاہم بی ٹو کیٹیگری کے صارفین 500 کلو واٹ تک کے فکسڈ چارجز میں 300 فیصد اضافہ دیکھیں گے کیونکہ وہ اب 500 روپے ماہانہ مقررہ چارجز کے بجائے 2000 روپے ادا کریں گے 5 ہزار کلو واٹ استعمال کرنے والے بی 3 کیٹیگری کے صنعتی صارفین 460 روپے ماہانہ سے 335 فیصد اضافے کے ساتھ 2000 روپے مقررہ چارجز ادا کریں گے.

رپورٹ میں بتایا گیا ہے کہ اس وقت بجلی کے یونٹ کی کل لاگت 72 فیصد فکسڈ چارجز اور 28 فیصد متغیر چارجز پر مشتمل ہے اب بھی ریونیو کی جانب فکسڈ چارجز صرف 2 فیصد ہیں اور متغیر چارجز 98 فیصد ہیں حکام نے کہا کہ متعلقہ حکام نے بجلی کے ٹیرف میں لاگت اور محصول کے ڈھانچے کے درمیان غلط مماثلت پائی ہے.