کراچی میں ایرانی قونصل خانے کی جانب سے ایک مقامی ہوٹل میں ایران و پاکستان کے بیچ سیاحت کے فروغ کے حوالے سے کانفرنس کا انعقاد

کراچی (اُردو پوائنٹ اخبارتازہ ترین - این این آئی۔ 23 جون2024ء) کراچی میں ایرانی قونصل خانے کی جانب سے ایک مقامی ہوٹل میں ایران و پاکستان کے بیچ سیاحت کے فروغ کے حوالے سے ایک کانفرنس منعقد ہوئی جس میں شہر کی معروف کاروباری، سیاسی، سماجی شخصیات کے علاوہ روس، ملائیشیا، کویت، جاپان اور بعض دوسرے ممالک کے قونصل جنرلز، صوبائی وزیر توانائی سید ناصر حسین شاہ، پاکستان کے صف اول کی ٹریول ایجنسیز کے نمایندوں اور میڈیا سے وابستہ افراد نے شرکت کی ۔

کراچی میں ایران کے قونصل جنرل جناب حسن نوریان نے اپنی تقریر میں میزبان کی حیثیت سے تمام حاضرین کا شکریہ ادا کرتے ہوئے کہا ایران نے سیاحت کے فروغ اور سفر کو مزید آسان بنانے کی غرض سے نہ صرف الیٹرانک ویزا جاری کرنا شروع کیا بلکہ دو مزید زمینی بارڈد کھولے ہیں جبکہ اس سے قبل پاکستان کے لوگ صرف ایک زمینی بارڈد سے آمد و رفت کر رہے تھے۔

(جاری ہے)

یہ دو بارڈر ریمیدان اور پشین کے علاقوں میں کھولے گئے ہیں۔انہوں نے مزید کہا کہ ایران میں لاتعداد سیاحتی مقامات قابل دید ہیں اور عالمی ادارے یونیسکو نے ایران کے پانچ تاریخی مقامات کو عالمی آثار قدیمہ میں شمار کر لیا ہے جبکہ چند دوسرے مقامات بھی اس حوالے سے زیر غور ہیں۔ایرانی قونصل جنرل نے پراعتماد لہجے میں کہا کہ ایران نے طبی میدان میں بھی خاطرخواہ پیشرفت کی ہے اور اس حوالے سے خطے کے تمام ممالک اور ہمسایہ ممالک کے ساتھ تعاون کرنے کا خواہاں ہے۔کتاب Parsia The Land of Emperors and Kings کے مصنف ڈاکٹر افتخار صلاح الدین، نے بھی معتبر اسناد و شواھد کی روشنی میں ایران کی تاریخ و ثقافت کے حوالے سے بہت مفصل خطاب کیا اور ایران کے اہم تاریخی و سیاحتی مقامات کا تعارف پیش کیا۔