آٹو فنانسنگ میں مسلسل 23ویں مہینے تنزلی

لاہور(اُردو پوائنٹ اخبارتازہ ترین - این این آئی۔ 22 جون2024ء)آٹو فنانسنگ مئی میں مسلسل 23ویں مہینے تنزلی کے بعد گر کر 233ارب روپے رہ گئی، یہ سالانہ بنیادوں پر 22.5فیصد اور ماہانہ بنیادوں پر 1.2 فیصد کمی ہے۔اعداد و شمار کے مطابق واجب الادا قرضے مئی 2023میں 300ارب روپے تھے جو اپریل 2024میں تنزلی کے بعد 236ارب روپے رہ گئے تھے۔جون 2022کے 368ارب روپے کے مقابلے میں آٹو فنانسنگ میں کل کمی 135ارب روپے رہی۔

(جاری ہے)

اسٹیٹ بینک نے تقریباً ایک سال تک شرح سود کو 22 فیصد پر رکھنے کے بعد 10جون کو اسے 20.50فیصد کر دیا تاہم اس کمی کے باوجود خریداروں میں نئی کاروں کی خریداری میں کوئی دلچسپی پیدا نہیں ہوئی۔کاروں، جیپوں، لائٹ کمرشل گاڑیوں اور پک اپس کی فروخت مئی کے دوران 17ماہ کی بلند ترین سطح 10ہزار 949یونٹس پر پہنچ گئی، یہ سالانہ بنیادوں پر 100فیصد اور ماہانہ بنیادوں پر 4فیصد اضافہ ہے، تاہم مالی سال 2024کے ابتدائی 11ماہ کی کل فروخت 25فیصد کم ہو کر 90ہزار 542یونٹس رہی، یہ حجم مالی سال 2023کے ابتدائی 11ماہ کے دوران ایک لاکھ 20ہزار 845رہا تھا۔