ٹرانسپورٹ کرایوں میں کمی کیلئے گرینڈ آپریشن ، بزرگ خواتین مسافروں کی وزیر اعلی مریم نواز کو دعائیں

لاہور (اُردو پوائنٹ اخبارتازہ ترین - اے پی پی۔ 20 جون2024ء) وزیر اعلی پنجاب نے ٹرانسپورٹ کرایوں میں کمی کیلئے صوبے بھر میں گرینڈ آپریشن کے دوران زائد کرایوں سے لٹنے والے مسافروں کی رقم واپس کراکر ایک نیا ریکارڈ بنا دیا ،تاریخ میں پہلی بار اضافی وصول کردہ کرائے کی رقم سواریوں کو واپس ادا کی گئی،مجموعی طور پر 14 لاکھ 67 ہزار 921 روپے کی رقم سواریوں کو واپس کی گئی،کرائے کی مد میں ناجائز طور پر وصول کردہ رقم واپس ملنے پر مسافروں کی خوشگوار حیرت،پیسے کیوں واپس کر رہے ہیں؟ سواریوں کا حیرانی اور پریشانی میں سوال ۔

اس موقع پر ڈپٹی کمشنرز اور پولیس عملے نے سواریوں سے گفتگو کرتے ہوئے کہا کہ وزیر اعلی پنجاب مریم نواز شریف کے حکم پر اتنا ہی کرایہ دینا ہے جتنا حکومت نے مقرر کیا ہے۔

(جاری ہے)

سرکاری ریٹ سے زائد کرایہ وصول کرنے والے ٹرانسپورٹرز کو ،27 لاکھ 84 ہزار 500 روپے کا جرمانہ عائد کیا گیا۔ انہوں نے کہا کہ گرینڈ آپریشن کے پہلے دن 3 ہزار 220 گاڑیوں میں کرایہ نامے چیک کئے گئے۔

مسافروں کے ٹکٹ، سواریوں کی تعداد کی پڑتال کی گئی، ٹکٹ کتنے کا خریدا؟ کے سوال پوچھے گئے ،خلاف ورزی پر 1448 گاڑیوں کے چالان، 354 گاڑیاں بند کر دی گئیں، مقررہ نرخ سے زائد کرائے وصول کرنے والوں کے خلاف 9 مقدمات بھی درج کئے گئے،رقم واپس ملنے پر بزرگ خواتین مسافروں کی وزیر اعلی مریم نواز شریف کو دعائیں ،اٹک، راولپنڈی، مری، چکوال، جہلم، گوجرانولہ، سیالکوٹ، نارووال، گجرات، حافظ آباد، منڈی بہاوالدین، سرگودھا، خوشاب، میانوالی، بھکر، چنیوٹ اور فیصل آباد میں ڈپٹی کمشنرز کی قیادت میں پڑتال کی گئی۔

ٹوبہ ٹیک سنگھ، جھنگ، لاہور، ننکانہ صاحب، شیخوپورہ، قصور، ڈی جی خان، لیہ، بہاولپور، مظفرگڑھ، راجن پور میں بھی مختلف ٹرانسپورٹ اڈوں اور روٹس پر چیکنگ کی گئی۔وزیر اعلی پنجاب مریم نواز شریف نے ڈپٹی کمشنرز، پولیس اور روڈ ٹرانسپورٹ اتھارٹی کے اہلکاروں اور عملے کو شاباش دی ۔وزیر اعلی پنجاب مریم نواز شریف نے عوام سے اپیل کی ہے کہ مسافر گاڑی مالکان کوصرف مقررہ کرایہ ہی ادا کریں، وزیر اعلی پنجاب نے انتظامیہ اور پولیس کو ہدایت دیتے ہوئے کہا کہ کرائے نامے گاڑیوں اور ٹرانسپورٹ اڈوں پر نمایاں لگائے جائیں۔