پنجاب فوڈ اتھارٹی کا گرینڈ آپریشن، معروف برانڈز کی جعلی ڈرنکس بنانے والا مافیا پکڑا گیا

لاہور (اُردو پوائنٹ اخبارتازہ ترین - آن لائن۔ 25 جون2024ء) پنجاب فوڈاتھارٹی کا جعلساز مافیا کیخلاف گرینڈ آپریشن ، تمام معروف برانڈز کی جعلی ڈرنکس بنانے والامافیا پکڑا گیا، مالک گرفتار، ملازم فرار ہو گئے ۔ ڈی جی فوڈ اتھارٹی کے حکم پر فوڈ سیفٹی ٹیموں نے نواحی علاقے چک 35برج مہلم میں واقع جعلی کاربونیٹڈ ڈرنکس یونٹ پر چھاپہ مارا ۔ 1850خالی بوتلیں، 300 کین، گیس سلنڈر، 3مشینیں، فلنگ پلانٹ،واٹر پمپ، پولیتھین، کیمیلز،لیبل، فلیورز ضبط کر لیے گئے جبکہ 550لیٹر سے زائد جعلی ناقص پانی، شوگر سیرپ تلف کر کے مقدمہ درج کر لیا گیا ۔

ڈی جی فوڈ اتھارٹی عاصم جاوید نے بتایا کہ کھلے رنگ،کیمیکلز اور آلودہ پانی سے جعلی بوتلیں تیار کی جا رہی تھیں، موقع پر جدید ریفریکٹومیٹر سے کیے گئے ٹیسٹ میں برکس صفر پائی گئی، معروف برانڈز کے جعلی لیبل لگی بوتلوں میں کیمیکلز اور کھلے رنگ ڈال کر نقلی ڈرنکس تیار کی جا رہی تھیں، ممنوعہ مضر صحت کھلے رنگوں،کیمیکلز سے تیار محلول بوتلوں میں بھرا جارہا تھا۔

(جاری ہے)

جعلسازی کا مکروہ دھندہ کرنے والوں کیخلاف مقدمہ درج کروا کہ تمام مشینری اکھاڑ کر ضبط کر لی گئی ۔ جعلی بوتلوں کولاہور میں مختلف چھوٹی بڑی دکانوں اور ریسٹورنٹس میں سپلائی کیا جانا تھا۔ڈی جی فوڈاتھارٹی نے کہا کہ جعلی بوتلوں کا گھنانا دھندہ کرنے والوں کا کاروبار جڑ سے اکھاڑ دیا جائے گا، ملاوٹ اور جعلساز مافیا کے خلاف زیرو ٹالرینس پالیسی کے تحت کام کر رہے ہیں۔زیادہ اور ناجائز منافع کی لالچ میں صحت کیساتھ کھلواڑ کرنے والے مافیا کا خاتمہ اولین ترجیح ہے۔