وزیراعلی مریم نوازعوام کی مشکلات کا جائزہ لینے کیلئے والٹن روڈ خود پہنچ گئیں، ستمبر تک 3رویہ کوریڈور ٹریفک کے لئے کھولنے کا حکم

لاہور (اُردو پوائنٹ اخبارتازہ ترین - آن لائن۔ 26 جون2024ء) وزیر اعلی پنجاب مریم نواز شریف عوام کی مشکلات کا جائزہ لینے والٹن روڈ خودپہنچ گئیں اوراے ڈی اے نالہ والٹن روڈ کی ری ماڈلنگ اور اپ گریڈیشن پراجیکٹ کا دورہ کیا۔ وزیر اعلیٰ مریم نوازشریف نے خود دورہ کرکے نالے اورروڈ کی تعمیر جائزہ لیا۔ وزیراعلیٰ مریم نوازشریف نے ڈیفنس موڑ پر ٹریفک کی صورتحال کا بھی معائنہ کیا۔

وزیر اعلیٰ مریم نوازشریف نے ستمبر تک والٹن روڈ کا تین رویہ کیرج وے عام ٹریفک کے لئے کھولنے اوراسی سال اکتوبر تک دونوں اطراف کی چھ رویہ والٹن روڈ عام ٹریفک کے لئے کھولنے کا حکم دیا۔ بعد ازاں وزیر اعلیٰ مریم نواز شریف کی زیر صدارت سائٹ آفس میں خصوصی اجلاس میں والٹن روڈ اپ گریڈیشن پراجیکٹ کا تفصیلی جائزہ لیا گیا۔

(جاری ہے)

سی او او منصور جنجوعہ نے پراجیکٹ پر تفصیلی بریفنگ دی۔

وزیر اعلیٰ مریم نوازشریف نے مون سون سے قبل والٹن روڈ پر عوام کو درپیش مسائل کا ازالہ کرنے کی ہدایت کی۔ وزیر اعلیٰ مریم نوازشریف نے کہا کہ عوام کو شدید دشواری کا سا منا ہے۔والٹن روڈ پرا جیکٹ کی جلد تکمیل ناگزیر ہے۔ والٹن روڈ کی جلد تکمیل کے لئے تمام وسائل بروئے کار لائے جائیں۔ عوام کی سہولت اور آسانی اولین ترجیح ہے۔ بریفنگ میں بتایا گیا کہ اے ڈی اے نالے کی تعمیر مکمل ہوچکی ہے، دو ڈسپوزل اسٹیشنز بھی تعمیر ہونگے۔

قینچی اور فیروز پور سے ڈی ایچ اے جانے والی ٹریفک کے لئے اوور ہیڈ برج بھی زیر تکمیل ہے۔ خواجہ سعد رفیق، صوبائی وزیر اطلاعات عظمیٰ زاہد بخاری، معاون خصوصی راشد نصر اللہ، چیف سیکرٹری زاہد اختر زمان سی او او بریگیڈیئر منصور جنجوعہ اوردیگر متعلقہ افسر بھی موجود تھے۔