محرم الحرام میں امن و امان برقرار رکھنے کیلئے سکیورٹی پلان پر عملدرآمد یقینی بنانا ہو گا،ڈی آئی جی آپریشنز

لاہور (اُردو پوائنٹ اخبارتازہ ترین - اے پی پی۔ 27 جون2024ء) ڈی آئی جی آپریشنزلاہور محمد فیصل کامران نے کہا ہے کہ محرم الحرام میں امن و امان برقرار رکھنے اور شہریوں کے تحفظ کیلئے سکیورٹی پلان پر من و عن عمل درآمد یقینی بنانا ہو گا، ایس پی، ایس ڈی پی اوز ،ایس ایچ اوز ،امن کمیٹیوں اور لائسنس ہولڈرز سے رابطے میں رہیں،محرم الحرام کے سکیورٹی اقدامات میں کسی قسم کی کوتاہی نہیں ہونی چاہئے،سپر وائزی افسران اپنے اپنے علاقہ کے ٹربل پوائنٹس چیک کریں اور پروگرام ہولڈز سے شورٹی بانڈز لیں۔

ان خیالات کا اظہار انہوں نے پولیس لائنز قلعہ گجر سنگھ میں اجلاس کے دوران کیا۔ ایس ایس پی آپریشنز،ایس پی ہیڈ کوارٹرز، 84تھانوں کے ایس ایچ اوز ودیگر افسران نے اجلاس میں شرکت کی۔

(جاری ہے)

محمد فیصل کامران نے کہا کہ کرپشن، اختیارات سے تجاوز کسی صورت برداشت نہیں کیا جائے گا،تخفیف جرم اورجھوٹا مقدمہ درج ہونے پر ایس ایچ او ذمہ دار ہو گا، جھوٹا مقدمہ درج کرنے پر ایس ایچ او اپنے تھانے کی حوالات میں بند ہو گا۔

ڈی آئی جی آپریشنز نے کہا کہ تھانوں میں موجود ملزمان پر تشدد اور غیر قانونی حراست کسی صورت برداشت نہیں کی جائے گی،جہاں اچھے کاموں پر حوصلہ افزائی کی جائے گی وہاں ہی ناقص کاکردگی پر باز پرس ہو گی۔ انہوں نے کہا کہ شہریوں کا تحفظ یقینی بنانے کیلئے اپنی صلاحیتیں بروئے کار لائیں، ہاٹ سپاٹ ایریاز میں موثر پٹرولنگ، پرہجوم جگہوں پر ڈیوٹی لگائی جائے،15کال پر فوری رسپانس کیا جائے، ایس ڈی پی اوز ایس ایچ اوز خود موقع پر پہنچیں۔

ایف آئی آر کے ایس او پیز کو فاسٹ ٹریک پر لائیں، مقدمات کا ایس او پیز کے مطابق اندراج یقینی بنائیں۔ انہوں نے کہا کہ شہر لاہور کو منشیات سے پاک کرنے کیلئے جاری آپریشن کومزید تیز کیا جائے۔پتنگ بازی پر زیرو ٹالرنس ہے، خلاف ورزی کرنے والوں کے خلاف بالا امتیاز کاروائی کی جائے۔ ناجائز اسلحہ اور ہوائی فائرنگ، اسلحہ کی نمائش،قبضہ مافیا، قحبہ خانوں کے خلاف سخت ایکشن لیا جائے۔قمار بازی میں ملوث بڑے مگر مچھوں کو قانون کی گرفت میں لایا جائے۔ الائیڈ ڈیپارٹمنٹس سے مل کر بجلی چوری کرنے والوں کو قانون کی گرفت میں لائیں۔محمد فیصل کامران نے ایس ایچ او کو عوام کی شکایات کے ازالے کیلئے دوپہر تین سے شام پانچ بجے تک تھانوں میں موجود رہنے کا حکم دیا۔