’ انٹرپرینیور شپ کلچر کے فروغ کیلئے ساز گار ماحول ترجیحات میں شامل ہے‘‘

لاہور (اُردو پوائنٹ اخبارتازہ ترین - آن لائن۔ 27 جون2024ء) وزیر اعلیٰ پنجاب مریم نوازشریف نے مائیکرو، سمال اینڈ میڈیم انٹرپرینیورشپ کے عالمی دن پراپنے پیغام میں کہا ہے کہ پنجاب حکومت کاروبار دوست پالیسیوں کے ذریعے ایس ایم ایز کو ترقی دینے اور سازگار ماحول پیدا کرنے کے لئے پرعزم ہے۔ چھوٹے کاروباروں میں سرمایہ کاری اقتصادی استحکام اور معاشی خوشحالی کے لئے ضروری ہے۔

وزیر اعلیٰ مریم نواز شریف نے اپنے پیغام میں مزید کہاکہ چھوٹے کاروبار اور انٹرپرینیورشپ میں جدت کی حوصلہ افزائی اور فروغ کیلئے اقدامات کے عزم کا دن ہے۔ سمال اینڈ میڈیم انٹرپرائزز (SMEs) معیشت کی ریڑھ کی ہڈی ہیں۔وزیر اعلیٰ مریم نوازشریف نے کہا کہ حکومت ایم ایس ایم ایز کو درپیش چیلنجز پر قابو پانے اور مدد فراہم کرنے کے لیے اقدامات کر رہی ہے۔

(جاری ہے)

چھوٹے اور درمیانے درجے کے کاروباروں کیلئے لوجسٹک سپورٹ، ٹیکنالوجی اور منڈیوں تک رسائی بڑھانے پر خصوصی توجہ کی ضرورت ہے۔ایس ایم ایز صرف اقتصادی ترقی ہی نہیں بلکہ معاشی عدم مساوات کم کرنے میں کردار ادا کرتا ہے۔انہوں نے کہا کہ پنجاب میں ایس ایم ایز کے ذریعے روزگار کے بڑے مواقع میسر ہیں۔ ایس ایم ایز کامینوفیکچرنگ، خدمات اور تجارت میں متنوع آپریشنز کے ذریعے پنجاب کی جی ڈی پی میں نمایاں شیئر ہے۔

ایس ایم ایز کی برآمدی صلاحیت سے غیر ملکی زرمبادلہ میں اضافہ ہوتا ہے۔ وزیر اعلیٰ مریم نوازشریف نے کہا کہ پنجاب حکومت زراعت، لائیو سٹاک اور گارمنٹس سمیت ہر شعبے میں ایس ایم ایز کی حوصلہ افزائی کر رہی ہے۔ زرعی قرضے فراہم کر کے کاشتکاری کو فروغ دینے کیلئے خصوصی اقدامات کئے گئے ہیں۔ ڈیجیٹل ٹیکنالوجیز اور ای کامرس پلیٹ فارمز کے ذریعے ترقی کے مواقع سامنے آئیں گے۔ انہوں نے کہا کہ ایس ایم ایز کی برآمدی صلاحیتوں کو بڑھا کربین الاقوامی منڈیوں تک رسائی آسان بنائی جا رہی ہے۔ انٹرپرینیورشپ کے کلچر کے فروغ کے لیے سازگار ماحول پنجاب حکومت کی ترجیحات میں شامل ہے۔