مظفر آباد، مودی کے مقبوضہ جموں وکشمیر کے دورے کیخلاف احتجاجی مظاہرہ

مظفرآباد(اُردو پوائنٹ اخبارتازہ ترین - این این آئی۔ 21 جون2024ء) پاسبان حریت جموںوکشمیر نے بھارتی وزیراعظم نریندر مودی کے مقبوضہ جموںو کشمیر کے دورے کیخلاف دارالحکومت مظفر آباد میں ایک زبردست احتجاجی مظاہرہ کیا۔ کشمیر میڈیاسروس کے مطابق سینٹرل پریس کلب کے سامنے ہونے والے مظاہرے کی قیادت پاسبان حریت کے چیئرمین عزیر احمد غزالی ، حریت راہنما مشتاق الاسلام ، مشتاق احمد بٹ ، عثمان علی ہاشم ، ڈاکٹر محمد منظور ، محمد اسحاق شاہین ، جاوید احمد مغل ، خالد محمود زیدی اور دیگر نے کی۔

مظاہرین نے نریندر مودی ، راج ناتھ سنگھ، امیت شاہ اور اجیت ڈوول کے پتلے نظر آتش کیئے۔ مظاہرے میں بچوں اور معمر افراد سمیت شہریوں کی ایک بڑی تعداد شریک تھی۔انہوںنے مودی کے مقبوضہ علاقے کے دورے کے خلاف سیاہ جھنڈے اور بینر اٹھا رکھے تھے ۔

(جاری ہے)

بینروں پر بھارتی تسلط سے آزادی کے حق میں اور مقبوضہ علاقے میں نہتے شہریوں پر جاری بھارتی مظالم کے خلاف نعرے درج تھے۔

انہوں نے ’’قاتل قاتل مودی قاتل ،جس کشمیر کو خون سے سینچا وہ کشمیر ہمارا ہے ، گو مودی گو بیک ‘‘کے فلک شگاف نعرے لگائے۔ مقررین نے مظاہرین سے خطاب میں کہا کہ مودی ہزاروں کشمیریوں کا قاتل اور جموں کشمیر کے تشخص پر حملہ آور ایک سامراجی حکمران ہیں، مقبوضہ علاقے کے لوگوں نے مودی کے دورے کو مکمل طور مسترد کردیا ہے۔انہوںنے کہا کہ بھارت کی تمام تر چیرہ دستیوں کے باوجود کشمیریوں کے حوصلے بلند ہیں اور وہ بھارت سے آزادی سے کم کسی چیز کو قبول نہیں کریں گے۔انہوں نے کہا کہ آزاد کشمیر کے عوام بھارت کے خلاف مزاحمت میں مقبوضہ علاقے کے اپنے بھائیوں کے شانہ بہ شانہ کھڑے ہیں۔